தீக்ஷைதீக்ஷை பெறுதல்
தாண்டக்கூடாத பாதுகாப்பு வழங்கும் 21 ஸத்ய கோடுகள்!!!
மனம் போன போக்கில் வாழும் உலக வாழ்க்கையில், நாம் அப்படி போகாமல் குரு வாக்கின்படி நடந்து, அருளும் பொருளும் பெற்று நிறைவான வாழ்க்கை வாழ வேண்டும் என்பதற்காகவும், உலக மனிதர்கள் அடைய போராடும் -நிம்மதியை- வாழ்வின் உயரிய உச்சபட்ச விஷயமான, இலக்கான நிம்மதியை, நாம் எளிய முறையில் அடைய வேண்டும் என்பதற்காகவும் — தாயும் தந்தையும் ஆன தெய்வம் ஸ்ரீ மஹாசக்தி அருள் குருவின் தீக்ஷை எடுத்துக்கொண்ட – தனது பக்தர்கள் கைக்கொள்ள வேண்டிய 21 கட்டளைகள், வாழ்க்கை நெறிமுறைகள்.
நாம் இனி தினசரி கடைபிடிக்க வேண்டிய உணவு, மனம், செயல், உறவு, தியானம், பக்தி, ஒழுக்கம், வளம், செல்வம், சீரிய வாழ்வு ஆகியவற்றை உணர்த்தும் அடையச்செய்யும், பூரண ஞானம் வழிபாடு நிறைந்த ஒன்றாகும் இது.
1தினசரி ஒரு பரிசு
காலை விழித்தவுடன், ஸ்ரீ மஹாசக்தி இன்றைய நாளை எனது கையில் பரிசாக கொடுத்து இருக்கும் ஒரு வாய்ப்பு என நினைத்து, அன்றைய வாழ்வை துவங்கு. வாழப்பழகு. இன்னும் நீ வாழ ஆரம்பிக்கவே இல்லை.
வாழ்வதற்கே அருள் வேண்டும். அதனை நினைத்து, இன்றைய தினம் “ஸத்யம் சமர்ப்பணம்! மஹாசக்திக்கு அர்ப்பணம்!!” என்று சொல்லி ஒவ்வொரு தினத்தையும் அர்ப்பணிப்புடன் துவங்கு.
2உடலே கோவில், உடல் ஆரோக்கியம் உனது முதல் வழிபாடு
உடலை சுத்தமாக குளித்து துடைத்து வைத்துக்கொள்; உடலே கோவில்! “தெய்வத்தை நினைத்து, தெய்வமாக..!” என்று சொல்லி நெற்றியில் சந்தனத்தை வைத்துக்கொள்.
தினமும் நீராடி, சந்தனம் பூசி புனிதத்தை உடல் வழியாக உணர்.
3தினமும் பணத்துடன், அருளும் சம்பாதி
ஒரு தூய எண்ணத்துடன் நாளைத்துவங்கு. “இன்று பணம் மட்டும் சம்பாதிக்க அல்ல! என் குருவடியான திரு மஹாசக்தியின் அருளையும் சம்பாதிப்பேன்.!!” என்று சொல்லி கொண்டு உனது அன்றாட வேலைகளை துவங்கு!
“குருவடி சரணம், திருவடி சரணம்.. குருவடி சரணம், குருஷக்தியே சரணம்.. திருவடி சரணம், மகாசக்தியே சரணம்..!”
4உணவின் மூலம் ஆயுள் விருத்தி
உணவை இறைவனின் அருள் எனக்கருதி, நன்றியுடன் எடுத்துக்கொள்.
நீரோ, உணவோ உண்ணும் முன், “எனது லட்சியத்தை அடைய, எனக்குக்கிடைத்த இந்த அமிர்தம், பிற ஜீவன்களுக்கும் கிடைக்கட்டும். ஓம் சாந்தி. ஓம் சாந்தி. ஓம் சாந்தி!” என சத்தமாக சொல்லிவிட்டு சாப்பிடு. எது ஒன்றை சாப்பிடும் முன்பும், இதை உச்சரித்து கொண்டு சாப்பிட்டு வா. வியாதிகள் வராது. வியாதிகள் தூரப்போகும். அதன்மூலம் உலகில் 8 பேர்களுக்கு உணவு கிடைக்கும்.
5ஆத்ம விசாரம்
ஒவ்வொரு நாளும் இரவின் முடிவில், குறைந்தது 15 நிமிடம் அமைதியாக உட்கார்ந்து உள்ளத்தை கேள். உனது மனதை விசாரணை செய். நீ செய்த சரி, தவறுகளை நீயே விசாரித்து அறி.
மன சுமையை தீர்க்க மனதை குளிக்கவை. சுத்தப்படுத்து. தூய்மையாக்கு. மனதிற்கு அமைதி தேவை. தினசரி இரவு படுக்கும் போது, “ஸத்யம் சமர்ப்பணம்.. மஹாசக்திக்கு அர்ப்பணம்..!” என்று சொல்லிவிட்டு படுத்துக்கொள்ள வேண்டும்.
6பிறருக்கும் வழி காட்டு
நீ நல்ல வழிக்கு வர வேறு ஒருவர் உனக்கு உதவியதுபோல, நீ ஒருவருக்காவது தினமும் பக்தி வழி காட்ட, நற்கதி அடைய உதவி செய். அதற்கு முயற்சி செய்.
இப்படி நீ பிறருக்கு செய்யும் உனது ஒரு சிறு உதவியாலும், நீ ஈசனை தழுவலாம். உனக்கு இறைவனின் நட்பு கிடைக்கும்.
7ஸத்யமே இறைவனின் நெருக்கம், அருகாமை
பொய், தில்லு-முள்ளு, திரித்து பேசுதல், கலகம் மூட்டுதல் தவிர்த்து வாழ்ந்தால், கடவுள் உன்னுடன் பேசுவார். சிரிப்பார்.
ஸத்யமே இறைமையின் நெருக்கம், அருகாமை. “பொய் தற்காலிகமாக கைகொடுக்கும். ஆனால், நிரந்தரமாக கைவிடும். ஸத்யமோ, கைவிட்டதுபோல தோன்றும். ஆனால், நிரந்தரமாக காப்பாற்றும்.” - குருஷக்தி வாக்கு.
8நல்ல வார்த்தை பேசு
தினமும் ஒருவருக்காவது நல்ல வார்த்தை சொல் – அதுவே நற்காரியம். ஐஷ்வர்யங்கள் பெருக இதுவும் ஒரு வழி!
“நீ நன்றாக வருவாய்” “நன்றாக இருக்கிறாய்” “பக்தி அடைய வாழ்த்துக்கள்” “உங்கள் பக்தி மெச்சத்தக்கது” “ஸ்ரீ மஹாசக்தியை வணங்குங்கள்” “பக்தியாக இருங்கள்” “குருவாக்கு பலித்தது” “உங்களை எண்ணி பெருமைப்படுகிறேன்” என்று, இப்படி வாழ்த்திப்பேசு.
9ஸ்ரீ மஹாசக்தியை சாட்சியாக வைத்து செய்
யாரும் என்னை கண்காணிக்கவில்லை என்று தப்பு கணக்கு போடாதே. எல்லாம் வல்ல, எங்கும் நிறைந்துள்ள மஹாசக்தி உன்னை பார்த்துக்கொண்டேதான் இருக்கிறேன். வீணாக மனித புகழ் பெற நினைக்காதே – உனது செயலில் உண்மை இருக்கவேண்டும்.
எதையும் செய்வதில் ஈசனின் காணிக்கையை போல செய். நீ எதை செய்தாலும் அதை எனக்கு, இறைவனுக்கு கொடுக்கும் காணிக்கையாக செய்ய வேண்டும். பிறர் மெச்ச, புகழ் பெற முயலக்கூடாது!
10உடனுக்குடன் தவறுகளை திருத்திக்கொள்
ஒரு தவறையும் இரண்டாம் முறை செய்யாதே – அதுவே உண்மை பிராயச்சித்தம். நீ சிலையாக முதல் படிக்கட்டு!
தவறு: மனித சகஜம் – ஆனால், திருத்தம்: தெய்வீகம். தன்னை திருத்திக்கொள்கிறவன் தெய்வத்தின் நண்பனாகிறான்!!
11பிறருடன் உன்னை ஒப்பிட்டுக்கொள்ளாதே! பிறரைப்பார்த்து பொறாமை கொள்ளாதே!!
பொறாமையினால் எவரையும் பழி பேசாதே, நிந்தை செய்யாதே – அது தீய பலனை உண்டாக்கும்.
பிறருடன் தன்னை ஒப்பிட்டுக்கொள்ளாததும், பிறரை புறம் பேசாததும் ஒரு பெரும் தவம். பொறாமை தவிர். ஒப்பீடுகள் வேண்டாம்.
12ஸ்ரீ மஹாசக்தி மந்திரம் உனது பாதுகாப்பு கவசம்
தினமும் ஸ்ரீ மஹாசக்தி கடவுள் நாமத்தை குறைந்தது 108 முறை ஜெபி. “ஓம் மஹாசக்தி! ஜெய் குருஷக்தி!!” (ஒரு நாள் முழுவதும் மொத்த எண்ணிக்கை)
நாமமே உயிரின் நடனம். உயிரின் பாதுகாப்பு. “ஓம் மஹாசக்தி! ஜெய் குருஷக்தி!!”
13எல்லாம் ஸ்ரீ ஸ்ரீ மஹாசக்தியின், ஸ்ரீ ஸ்ரீ குருஷக்தியின் விளையாட்டு லீலைகள்
வாழ்க்கையில் நடக்கும் ஒவ்வொரு விஷயத்தையும், ஸ்ரீ மஹாசக்தி ஆன “அவனது விளையாட்டு” என்று பார்ப்பதற்குப்பழகு. நெருப்பில் போட்டாலும் சொக்கதங்கமாக மாறுவாய் நீ.
ஒவ்வொரு நிகழ்வும் ஸ்ரீ மஹாசக்தி ஆன அவனது லீலை. உனது வாழ்க்கையில் அவ்வப்போது ஸ்ரீ மஹாசக்தி லீலைகளை நிகழ்த்தி, சோதனைகள் செய்து, உன்னை வாழ்த்தி ஆசிர்வதிப்பார்கள். வேறு வேறு உருவங்களில் வந்து உன்னை சோதிப்பார்கள். அதை நீ புரிந்து கொள்வாய். புரிந்து கொள்ளப்பழகு. அந்த சோதனைகளில் தேர்ந்து வருவதற்கு பழகு.
14ஒருவருக்கு உண்மையாக இரு
மனிதருக்கு உண்மையாக இருந்தால் மறந்து விடுவார்கள். காலப்போக்கில் கண்டது யார் என்று கடந்து சென்று விடுவார்கள்.
இறைவனுக்கு உண்மையாக இருந்தால், எனது உண்மை பக்தன் என்று சொல்லி, அருளும் பொருளும் அள்ளி வழங்கி ஆசிகள் செய்வார்கள்! வட்டியும் முதலுமாக அருள் ஆசி புரிவார்கள்!!
15இனி உனது குரு மஹாசக்தி! இனி உனது தெய்வம் மஹாசக்தி!!
“ஓம் மஹாசக்தி! ஜெய் குருஷக்தி!!” என்று சரணடைந்து விட்ட உனக்கு, இனி விமோச்சனம்தான். உனக்கு யாரும் கட்டுகள் போட முடியாது. வினைகள் செய்ய முடியாது.
உன் விடுதலை உன் கையில். இதை காப்பாற்றி கொள்ள வேண்டிய பொறுப்பு உன் கையில் உள்ளது. உன் பக்தியில் உள்ளது. பக்தி குறையாமல் பார்த்துக்கொள்.
16பக்தியே சொத்து
வாழ்க்கையின் கடினமான நேரத்திலும் நம்பிக்கையை இழக்காதே. உன் பக்தியை விடாதே. பக்தி பத்தும் தரும். பக்தி பத்தும் செய்யும்.
“இது கூட ஸ்ரீ மஹாசக்தி கடந்து போக செய்து விடும்…” என நம்பு. பொறுமையாக இருங்கள். இறுதியில், அருளும் ஆசிகளும் கிடைக்கும்.
17ஒத்திபோடாதே! சோம்பி இராதே!!
அன்று அன்றைய கடமைகளை அன்று அன்றே செய்து முடி. ஒத்தி போடாதே.
சுறு சுறுப்பாக இரு. பிறர் உற்சாகத்படுத்த வேண்டும் என்று எதிர்பார்த்து கொண்டு இருக்காமல், ஸ்ரீ மஹாசக்திக்கு செய்வதாக நினைத்து கொண்டு “ஸத்யம் சமர்ப்பணம்.. மஹாசக்திக்கு அர்ப்பணம்..!” என்று சொல்லி கொண்டு செய். செய்து முடி. ஸ்ரீ மஹாசக்தியே உன்னை மெச்ச வேண்டும். ஸ்ரீ மஹாசக்தியே வெகுமதி கொடுப்பவராக இருக்கிறார் என்பதை புரிந்து கொள்!
18ஸ்ரீ ஸ்ரீ மஹாசக்தியே உறவு! ஸ்ரீ ஸ்ரீ மஹாசக்தியே நட்பு!!
உனக்கு யாரும் ஆதரவு இல்லையே என்று நினைத்து பயம் கொள்ளாதே! உன்னை யாரும் புரிந்து கொள்ளவில்லையே என்று வருந்தாதே! – உனது புதிய வாழ்வு, இன்று உன் பக்தியோடு தொடங்குகிறது. ஸ்ரீ மஹாசக்தியே உனக்கு உறவும், நட்புமாக இருக்கிறது. தெய்வமே உனக்கு துணையாக இருக்கிறது. உனக்கு உறவாக இருக்கிறது. ஸ்ரீ மஹாசக்தியின் பார்வையில் நீ இருக்கிறாய்! உனக்கு இனி கவலைகள் இல்லை.!
ஒவ்வொரு நாளும் இனி புதிது – தாயும் தந்தையுமான ஸ்ரீ மஹாசக்தி உன்னை காக்கிறது! ஆக்குகிறது!! வழிநடத்துகிறது!!!
19ஸத்யமேவ ஜெயதே! வணக்கம்!!
வணக்கம் சொல்லுவதில் எந்த அர்த்தமும் இல்லை. “ஸத்யம்தான் வெல்லும்” என்று சொல்வதில் எல்லாமே அடங்கி உள்ளது.
அதனால் யாருக்கும், எவருக்கும், காலை, மாலை, இரவு எப்போதும் “ஸத்யமேவ ஜெயதே” என்று இரு கைகளை கூப்பி வணங்கி வா. அதற்கு பழகு.
20எனது குரு வாக்கிற்கு இல்லை, மறு வாக்கு
குருவின் வார்த்தையை பின்பற்று – அவை பாபங்களை விலக்கும் பரிகாரங்கள். அதுவே இருள் வாழ்வில் ஒளியாக நமக்கு வழி காட்டுகிறது! குருவாக்கையும், நமது ஆஷ்ரம இயக்கங்களையும் உயிரென போற்று. பாதுகாத்து வா. அது உன்னையும், உனது வம்சத்தையும் காப்பாற்றும்.
குருவே வழி. அந்த வழியே நமக்கு கதி.
21ஸ்ரீ மஹாசக்தி பக்தன் என்பதே எனது பெருமை
தினமும் “நான் ஒரு ஸ்ரீ மஹாசக்தியின் பக்தன் என்பதை மறக்காதே!” அதுவே எனது மாபெரும் முதல் சொத்து ஆகும்.
அந்த நினைவே.. உன்னை தெய்வீக வழியில் வைத்து செல்லும். உன்னை பாதுகாக்கும் சக்தி! நீ எல்லாவற்றிலும், எல்லோருக்கும் முன் உதாரணமாக இருக்க வேண்டும். நீ பிறரை ஒப்பிட்டு பார்த்து கொண்டு, அவர்கள் பின்னால் நின்று கொண்டு இருக்க கூடாது.
இவை 21 கட்டளைகள் அல்ல.. உனது ஆன்மா கடக்கும் இந்த வாழ்க்கை இருளில், 21 வெளிச்சத்தின் வழிகள்..!
குருவடி சரணம், திருவடி சரணம்!குருவடி சரணம், குருஷக்தியே சரணம்!!திருவடி சரணம், மஹாசக்தியே சரணம்!!!
எனது குருவடியின் இந்த 21 கட்டளைகளுக்கும், 21 கோடுகளுக்கும்நான் கட்டுப்படுவேன் என்றும்தினசரி கடைப்பிடிப்பேன் என்றும் ஸத்யம் செய்கிறேன்.இதிலிருந்து நான் மீற மாட்டேன், மாற மாட்டேன் என்றும்,ஸத்யம் செய்கிறேன்.
ஸத்யம். ஸத்யம். ஸத்யம்.
